Indosneeza

Viu z heiss viu z warm
Viu z viu Mönsche viu z viu lärm u
überhoupt ni wie Bern

U gliich
Vouer gwunder uf frömds Esse wo mä cha propiere
O we wege dr Hitz s Hirni überhoupt ni wott funktioniere

U dr inner Schweinehund sich ganz fest duet werä

S Strasseüberquere ganz neu lerä
U am gliiche Abe dr komplett Darminhaut entlerä
Sich primär vo Bioflorin ernähre
U drbi nie e Lernfähigkeit bewähre
U immer wieder vom Streefood degustiere
Wiu dr Glust uf das feine Esse haut glich duet dominiere

Sich mega fröie mit dene zwöi mega tolle Mönsche wieder chönne Zyt z verbringe

U zeme ganz viu chlini Abentüür z'beginne

Gspüre wie mä jede Moment zeme gniesst
U glich merkä wie d Zyt viu viu z schneu verfliesst

Gnue ha vo lutem Vercheer u de Mönschemasse
U de Strasseverchöufer, ömu vo de sasse

Aso Los!
U uf u drvo vereise is Paradis

Mitemne Zügli wo dank Disu über d Schine flitzt wie über Iis

Drbi aber chrank wärdä vo dere blöde Kliimaalag
u jedesmau ufgweckt wärdä, vo dere blöde lute Zugdurchsag

Mit ere eher chrübbelige Fähre dr Ozean* überquere

U mitemne gfahrelustige Taxi Fahrer die haubi Insle dürchquere

Endtlich in Amed acho u is warme Wasser itouche
U üsi arme Köpf abchüele wo vor Hitz scho rouche

E bunti Ungerwasseerwäut endecke mit grosse Ouge

U beobachte wie eim ganz viu chlini cuti fischli fouge

E riise Schreck becho wiu e hunne riise Fisch
mim Brüetsch fasch dr zeihe frisst

Dr Abe la usklinge mit Nasi Goreng, früsche Frücht u emne grosse Lache im Herze

U baud baud baud vouer Schmerze
Langsam müessi witer zieh

Is Riisfäuder umrahmte Ubud
Scho verdammt schön hie!

Dr schärfst u best Fisch esse wo ig je ha gha
U gliich langsam müehse gah

Richtig Mönschemasse u Tourismusgasse

Luti Musig u betrunkni Lüt
Fröie mi es bitzeli wede mi Flüger flügt

Vouer Herzschmerz die letschtä Täg mit mini Lieblingsmönsche* gniesse
U es paar herzzerbrechendi Träne vergiesse

Die zwöi es letschts mau umarme u ganz fest as Herz drücke
Sie hingerlöh haut scho e riise Lücke

Sich aber dürfür umso meh fröie se de baud einisch wieder z gseh

U ig muess erhlich si, dank ihne hets mi jetzt o chli packt,
Das cheibe Fernweh

*Eigentlich war es die Balisee.
**Das stimmt natürlich nicht ganz.
Aus poetischen Gründen wurde die Anzahl der Lieblingsmenschen hier auf zwei beschränkt.

Geschrieben von Lisa Cosandey / Spick ❤️